Galicia conta desde con catro novos restaurantes recoñecidos con 1 Sol Guía Repsol: os coruñeses ‘Indómito’ (Santiago de Compostela) e ‘Nordestada’ (Porto do Son), o ourensán ‘Marmurio do Rio’ (Allariz) e o pontevedrés ‘Meloxeira Praia’ (O Grove). Con estas incorporacións, Galicia suma un total de 43 restaurantes galardoados: 2 con Tres Soles, 13 con Dous Soles e 28 cun Sol. A gastronomía está a cambiar. A esencia das ‘casas de comidas’ que se estende polo sector debuxa un novo escenario e propón un envorco na relación entre cociñeiros e comensais.
En 2025, destacan os proxectos onde o agarimo e o coñecemento do oficio crean un clima relaxado e converten cada mesa nun refuxio no que esquecerse de todo o que non sexa gozar. Sabores emocionais explotan en pratos alegres, que parten de produtos de proximidade e de receitas intuitivas, interpretadas con códigos e técnicas actuais. A ilusión por sorprender dos 90 Soles Guía Repsol que se incorporan este ano percorre cada territorio e constata que as cidades cederon parte da súa hexemonía ao campo. Os pobos benefícianse da diversificación e atraen a un viaxeiro encantado de poder descubrir restaurantes interesantes en calquera lugar.
O presidente de Repsol, Antonio Brufau, destacou “a vontade dos chefs por impulsar economicamente a contorna, colaborando con produtores, artesáns e outros negocios locais. Un compromiso que crea comunidade e é clave para seguir crecendo”. María Ritter, directora de Guía Repsol, pola súa banda, apuntou que “o concepto ‘casa de comidas’ contén ingredientes tan poderosos como a autenticidade, a proximidade e o orgullo de converter o legado en pratos sorprendentes.